Сургалт эрдэм шинжилгээ

ЭМЖЖ эмнэлэг нь  их эмч, сувилагч, лаборант болон инженер, бусад мэргэжилтнүүдийг чадавхжуулах, мэргэжил, мэдлэгийг дээшлүүлэх зорилгоор хамтын ажиллагаатай гадаадын их сургуулиудад мэргэжил дээшлүүлэх сургалтад тогтмол хамруулан, танилцах болон мэргэжил дээшлүүлэх дадлага хийлгэдэг бөгөөд 1997 оноос ХБНГУ-ын Вюрцбургийн их сургуультай хамтын ажиллагааны гэрээ байгуулан Акустик инженер бэлтгэх, Чих хамар хоолойн мэс заслын чиглэлээр, 2005 оноос БНСУ-ын Сөүлийн Үндэсний Их Сургуулийн харьяа Бунданг эмнэлэгтэй хамтын ажиллагааны  гэрээ байгуулж, эмч, мэргэжилтнүүдээ 7-30 хоногийн богино хугацааны, 3-6 сарын урт хугацааны сургалтад үе шаттайгаар хамруулан "Дотор чих", "Тэнцвэр", "Төвөнх-залгиур", "Хүзүүний эхо", "Чих, хамар, хоолойн мэс засал"-ийн чиглэлээр мэргэжил дээшлүүлэн нарийн мэргэжил эзэмшүүлэн сургаж, хөгжүүлж байна.  Мөн Hana-ENT, Yonsei Gannam, Soree, Ajou их сургуулиудтай хамтран ажиллаж байна.

2005 оноос "АШУҮИС", "Ач" АУДС, "Оточ маарамба" АУДС-уудтай сургалтын гэрээ байгуулан  төгсөлтийн өмнөх оюутны сургалт, "ЭМХТ", "АШУҮИС"-ийн "МДИ"-тай хамтран ажиллаж, төгсөлтийн дараах резидентийн болон нарийн мэргэжил эзэмшүүлэх сургалтыг явуулж байна.  2011 оноос АШУҮИС-ийн сургалтын бааз эмнэлэг болж өргөжиж, Монгол улсын хэмжээнд Чих хамар, хоолой, сонгол, тэнцвэр судлалын нарийн мэргэжлийн эмч, сувилагч, лаборант зэрэг нарийн мэргэжилтэн бэлдэж ирсэн.Орчин үеийн бүрэн тоноглогдсон сургалтын танхимтай бөгөөд дуу, дүрс дамжуулах дэвшилтэт технологи ашиглан мэс заслын явцыг дамжуулан оюутан, суралцагч, резидент эмч нарт үзүүлж, амбулатори, сонгол сэргээх тасаг, мэс заслын тасагт тойролтоор дадлагажуулан сургаж байна.